O, Mandailing Godang,
Tano ingananku sorang,
Na niatir ni dolok na lampas,
Na nijoling ni dolok na martimbus,
Ipulna na laing bubus,
Tor Sihite tingon julu,
Patontang dohot tor Barerang,
Gurung-gurungna manompi Lubu,
Bohina mangadop tu dolok Sigantang,
Muda hutalihon tu utara,
Laho manindo tu irsanya,
Jonjong ma huida Lubuk Raya,
Asa manjoling dolok,
Muda hutindo tingon Bania,
Hutatap ma aek ni Batang Gadis,
Mangelduk-elduk dalannia,
Atir hamun Györ marbaris,
Jaru pe ia aek na raja,
Na suntut godang jaotanna,
Timbal bondar panombar saba,
Tusi ma da muarana,
O na marsaba na bolak,
Muda disabur ho sajual same,
Dapot ho ma onom pulu jual mulak,
Ho ma na garang manggadis eme,
Na tumbur ma nian tanomu,
Tai laing tong do ho longang,
Jaru momo pe dibaen ho suan-suanan mangolu,
Inda ra halak tu ho mardagang,
Aha ma rohai tue,
Dalanna so nada rami?
Dokkon ma hubege,
Anso torang di rohanami,
Ia di jae ni Batang Angkola,
Taringot tu Aek Godang,
Songon na muntul ia mulak,
Baon sompit buluson tu Batang Singkuang,
Muda ro sirumondop udan,
Magodang ma batang ni aek,
Doblen sompit hadabuan,
Jadi tu darat doma manaek,
I ma da dongan dalanna,
Anso jadi bonca-bonca,
Holas na haruar tingon bagasanna,
Arun sajo do diobansa,
Adong halak ruar,
Na mian di Panyabungan,
Tibu ia haruar,
Baon ia Madang busungon,
Inda ale hum i sajo,
Dalan ni jagal ngada manjadi,
Tai adong dope dabo,
Tor pangolat ngada tarbolus padati,
Tai jara songon i ba,
Dengganmu sai hurang,
Nada ho huparmuda ba,
Angke di son ma huida parjolo ari torang,
Tingla ma ho jolo ale,
Anta piga taon nada huboto,
Muda huida ho mulak muse,
Ulang be nian sai maoto,
Laho hita marsarak,
Marsipaingot dope au di ho,
Ulang lupa paingot danak,
Manjalahi bisuk na peto,
(Willem Iskandar, Sibulus-bulus Sirumbuk-rumbuk, tingon Adian Bania)
